سباق البنك الوطني الكويتي للمشي السادس عشر لعام 2010 هو باختصار سباق من تنظيم واشراف البنك الوطني الكويتي في شهر مارس من كل عام وماشاءالله في كل سنه تزيد شعبيته عن السنه اللي قبله حيث يصل عدد المتسابقين في السباق الى الالاف من الجنسين الذكور والنساء ويقسمون المتسابقين الى فئات طبعا تكون مسافة انطلاق النساء هي 6 كيلو تبدأ من المارينا كريسنت وتنتهي في الجزيره الخضراء ومسافة الرجال هي 8 كيلو متر تبدأ من المركز العلمي وتنتهي في الجزيرة الخضراء الواقعه على شارع الخليج العربي
فئات المشاركين من النساء والرجال حسب العمر :
اللون الازرق الفاتح البنات من عمر 15 الى 20 سنه
اللون الاصفر النساء من عمر 21 الى 35
اللون الاحمر من النساء من عمر 36 الى 49
اللون الوردي من النساء من عمر 50 فما فوق
الحين فئة الرجال ...
اللون الازرق الغامج من عمر 15 الى 20
اللون الابيض من عمر 21 الى 35
اللون الاخضر من عمر 36 الى 49
اللون العنابي من عمر 50 فما فوق
والحين سلمكم الله نبلش بعض اللقطات من السباق واللي ماقصروا فيه البنك الوطني من حسن تعامل مع المشاركين والصحافه والتلفزيون وتوزيع الماي والعصير ومشروبات الطاقه للكل قواهم الله

بداية تجمع المتسابقين عند المارينا كريسنت تحت الاشجار عشان شوي تخفف عليهم من قوة الشمس مع انه الجو عادة في هالشهر يكون شوي زين مو حر حيل مناسب للمشي

ينطرون انطلاقة السباق

على راس البابا ... على أمل المشاركه في السباقات القادمه الله يحفظها ان شاءالله

ماعليج الصوره حلوه ان شاءالله لاتحاتين

تعديل وربط الشعر استعدادا للسباق

توزيع مشروبات الطاقه ... ترى زين زين يساعد على المشي

بداية صف المشاركات للسباق وتصوير من الصحافيين

اووووكي صفوا عدل

اللون الاصفر ينطرون دورهم بعد مايبلشون اللون الازرق الفاتح بربع ساعه تقريبا عشان لاتصير زحمه ولويه في السباق الترتيب ظروري ومطلوب وفعلا الشغل مرتب

علامة النصر قبل بداية السباق ... يالله ان شاءالله عاد تفوزون وشدوا الحيل

جاهزين للتحدي والفوز ؟؟

ياهلا ومرحبا ... مو وقت سلام بيبلش السباق

احد القائمين على السباق يعطيهم العافيه ... وعلامة الـ NBK
البنك الوطني الكويتي
ومستعدين للانطلاق

جاهز ... انطلق

يايبا خلوا التلفونات الحين السباق بلش وانتوا مجابلين التلفون شلون بتفوزون ؟؟ ترا فيه جوائز حلوه والله

قناة الراي حاضرة السباق ... وروبرتاج للحدث من قبل مذيعة تلفزيون الراي نورهان
والحين مع اللون الاصفر

تسخين وشوية لياقه من بين المشاركين

وليـــه هم تلفون ؟؟ يبا انتبهوا للسباق ياناس مايصير جذي شلون بتفوزون ؟؟

عدل عدل يا التصوير
وابتدأ السباق

مستعيله الله يهداج على الانطلاقه شوي شوي وخري الحبل اول بعدين انطلقي لفيتيه عليج من كل صوب يابنت الحلال

وبدأت المسيره وانطلقنا احنا الى نقطة النهايه في الجزيرة الخضراء بسيارتنا عشان يمدينا نلحق على وصول الفايزين ... طبعا مانقدر ننطر لغاية انطلاق باقي الفئات ولا ننطر بداية فئة الرجال لأنه راح يطوفنا وصول الفائزين لنهاية السباق واحنا للحين ماوصلنا ... واكمل معاكم هذه اللقطات لغاية الوصول

قواج الله شدي حيلج ترى مابقا شي

لاحظوا ماشاءالله اعداد المتسابقات هذي فقط فئه وحده فمابالكم في باقي الفئات ؟؟ فعلا يعطيهم العافيه اللي قدروا على تنظيم كل هالمشاركين

وعلامة النصر حاضره ايضا ... ماشاءالله مصممه على الفوز ... الله يوفقج

شفيج عسى ماشر متغطيه

يايبا اسمه سباق مشي مو تنطرون رفيجاتكم على مايوصلون امشوا كملوا طريجكم بارك الله فيكم عشان يمكن تفوزون

افسحوا الطريق ياسيارات افسحولهم خلوهم يمشون على راحتهم

ايضا احد الزملاء من المصورين يمارس هوايته في التقاط بعض الصور للمشاركين والمشاركات

ربطي الخيط مال اللابجين انفج لاتتعرجبين فيه وتطيحين

اي الله يوفقج ان شاءالله .. بس شوي سرعي خطوتج العالم قربوا يوصلون ترا

الميه تروي العطشان

حكم حكم بالطريق ... يراقب شروط السباق اللي يركض يسجل رقمه ويشطبه من السباق واللي يحصل مساعده من الغير يعني مثلا سياره تركبه او سيكل او قاري يركبه ويقطه جدام هم يعتبر مشطوب ... يعني ديروا بالكم هذا المراقب قاعدلكم بالمرصاد
شكرا يعطيكم العافيه حكام

وبطول الماي على طول الطريق توزع بالمجان على المشاركين

ممممممممممممم جنه هذي اللي متصدره السباق من هالفئه للحين

ووصلنا ولله الحمد الى خط النهايه والحكام ولجنة البنك الوطني في استقبال المشاركين

وبطول الماي ايضا في انتظار المستابقين ... اكيد يبون ماي خو المسافه اللي اقطعوها مو شويه الصراحه

ها ؟؟
جنه صار في تبادل في المراكز على خط النهايه ... ماشاءالله هذي من وين اطلعت الاولى ؟؟
صج لي قالوا العبره في النهايه ... يالله مبروك للفائزين والفائزات

متسابقه تحاول الوصول وفي نظارتها جدامها متسابقه توها طايحه على الارض من التعب ... والحمدالله اسعفوها المسعفين وقامت مافيها الا العافيه

ياسلام ... ايد فيها ماي والثانيه عصير ... يالله عليج بالعافيه

خوش طريقه لتخفيف الحر تحطون بطل الماي البارد على ويووهكم وان شاءالله كل اموركم طيبه

خوش استفاده ايضا من التيشيرت المخصص للسباق وهو الحمايه من الشمس وعمله شمسيه

ماشاءالله تبارك الرحمن هذا صجي والا مو صجي ؟؟
لااله الا الله ... ذكروا الله ياجماعه ذكروا الله
ترى ذكر الله زين سبحانه

وصول بعض الفئات مع بعض

وجني اشوف احد الفائزين في فئة الرجال ... بينوا بينوا ماشاءالله عليهم

ومتسابق آخر



يعطيك الصحه والعافيه عمي

دريولنا عاش عاش دريولنا بيب بيب

ووصلوا المتسابقين لنقطة النهايه وتجمعوا في المسرح المخصص لهم داخل الجزيرة الخضراء لبدأ الاحتفال

وانطلقت صافرة بدأ الاحتفال



تفافيخ وكور البنك الوطني



يشاهد الاحتفال من الاعلى

ايضا شعار الجمل للبنك الوطني موجود على وجوه الحضور

نظرة تأمل وترقب للفوز

ونظرة ترقب للموبايل

وتم خلال الحفل السحب الشهري لحساب الجوهره لشهر مارس 2010 على 125 الف دينار وحصل الفائز الثاني في السحب على 7500 دينار
والفائز الثالث على 3000 دينار وحصل بقية الفائزين الـ 97 المشاركين في حساب الجوهره على مبلغ 400 دينار
طبعا هذيل غير الجوائز اللي قدموها للمشاركين في سباق المشي
وفي الاخير شكرا لكل القائمين على السباق في البنك الوطني وشكرا لكل المتسابقين والمتسابقات ... وشكرا للحضور الكثيف اللي حضر الاحتفال وشكرا لكل واحد كان هناك وكل واحد كان وده يروح وماراح
واشوفكم ان شاءالله في لقاءات أخرى
مع السلامه